美股港股表現南轅北轍，美股上周五三大指數再創新高，港股則十個交易日跌咗九個交易日，除咗上星期四死貓彈一彈，港股呢期又回復弱勢，但暫仍未走出24500至25600呢個range，只係今日就落咗一個月低位。
恒指低開126點，盤中曾跌236點，見24633點一個月低位，其後喘定，跌幅一度收窄至32點，見24837點半日高位，中午收市前跌幅又擴大。恒指中午報收24728點，跌141點；國指報收8774點，跌64點；恒科指半日跌89點，報收6187點，跑輸大市。
藍籌股中科網股表現較弱，ATMX只有小米(01810)站得住腳，始終股價已落到接近廿皮呢啲大位，點都頂倒幾下。騰訊(00700)跟美團(03690)跌逾1%，阿里(09988)保持其長期弱勢，半日跌2.3%。舜宇(02382)上星期威咗兩日，今日半日跌近6%，一下就抹去上周升幅。其他科網股表現強差人意，半日閒閒地跌2%以上。
除咗科網股走弱，疫苗股跟醫療股亦見資金流出，輝瑞發表新冠病毒特效藥臨床試驗報告，稱旗下新冠口服藥用藥者減少89%住院和死亡風險。疫苗及醫療股重挫，騰盛博藥(02137)插25.6%；開拓藥業(09939)曾插17.3%，半日僅跌1.6%；康希諾生物(06185)插15.3%；復星醫藥(02196)跌3.2%；半新股三葉草生物(02197)重挫20.6%。CRO龍頭藥明生物(02269)遭高瓴減持，今日再挫8.3%，失去其紅底股地位。
肺炎疫情雖然反覆，但有口服藥呢個喜訊，刺激旅遊出行股上升，市場憧憬因為口服藥可以抑制疫情，全球通關指日可待，出行股今日受捧。航空股普遍錄得4%以上升幅，相關機場股跟航訊股亦有追捧。另外新秀麗(01910)半日升13.8%，同程藝龍(00780)半日升近6%；提醒一句，就算全球通關令國際旅遊業復甦，多咗人去旅行，唔代表人人出行都要買過隻行李喼，始終呢啲係耐用品，邊有話多咗人出行，就無啦啦會賣多咗喼，好似阿Man本人，就算通關出門，亦無需要額外添置多兩個行李喼。
至於濠賭股今日亦有資金追捧，相關股份升幅由超過2%至7%不等，但阿Man唔主張追貨，有心買貨都等回調收集，始終澳門短期通關都係市場一廂情願，內地仍然嚴格防控疫情，又點會喺疫情仍反覆下，咁輕易全國甚至對外通關。
麥狄文
(徐狄怡‧證監會持牌人)
【盤房來料】內地全國或對外通關十劃未有一撇- 信報網站hkej.com - 信報財經新聞
Read More
Tidak ada komentar:
Posting Komentar